التعليم العالي: إتاحة تسجيل بيانات الطلاب الحاصلين على الشهادات الثانوية عام 2024/الهرم المصرى نيوز

 بقلم: كنزي رامي 

رئيس قسم الفن والأدب (مكتب 6 اكتوبر)

جريدة الهرم المصري نيوز 

أوقات كتير بنتلخبط بين حاجتين شكلهم شبه بعض، لكن في الحقيقة الفرق بينهم كبير جداً: الأنانية وحب الذات. واحدة بتقفل عليك كل الأبواب وتخلي الناس تبعد عنك، والتانية هي اللي بتخليك تعرف تقف على رجلك وتعمل علاقات سوية.

احنا اتربينا على فكرة مش صح، وهي إنك لو بتحب نفسك تبقى أنانية، وإن الشخص الكويس هو اللي بيجي على نفسه طول الوقت. وده اللي علم النفس أثبت إنه مش صح، ده غير إنه بيخلينا تعبانين نفسياً على الفاضي.

حب الذات مش أنانية

حب الذات ببساطة إنك تبقى عارف قيمتك كويس. إنك تحترم وقتك ومجهودك، وتعرف تقول "لأ" لما الحاجة تبقى فوق طاقتك من غير ما تحس بالذنب. إنك تاخد بالك من صحتك ونفسيتك، لأنك مش هتعرف تدي لحد حاجة وانت من جواك فاضي أصلاً.

اللي بيحب نفسه بجد مش مستني كلمة حلوة من حد عشان يحس إنه يستاهل. هو مقدر نفسه من الأول، وعشان كده بيبقى أهدى وأعقل، ولما بيدي لحد بيدي من قلبه بجد مش عشان مستني مقابل. والحب ده هو اللي بيخليك تكتسب ناس كويسة حواليك، وشغل يحترمك، وحياة شبهك.

والموضوع مش كلام كبير، الموضوع في التفاصيل الصغيرة اللي بنعملها كل يوم؛ زي إنك تنام كويس، تبعد عن أي موضوع ملهوش لازمة بيستنزفك، وتسامح نفسك على غلطة قديمة وتتعلم منها.

أما الأنانية بقى دي حاجة تانية خالص

الأناني شايف الدنيا من زاويته هو وبس. احتياجاته أهم من أي حد، وراحته مبرر إنه يدوس على مشاعر اللي حواليه. هو مش بيعمل علاقات، هو بيستغلها. مش بيشارك، هو عايز ياخد كل حاجة لنفسه.

الفرق كله في النية. حب الذات بيقول: "ازاي أحافظ على نفسي من غير ما أذي غيري". والأنانية بتقول: "ازاي آخد اللي انا عايزه حتى لو هاجي على غيري".

وعشان كده الأناني دايماً قلقان ومتوتر، خايف حد ياخد حاجة منه، بيقارن نفسه بالناس طول الوقت، وبيتعصب بسرعة، وفي الآخر بيلاقي نفسه لوحده، لأن مفيش حد يستحمل أنه يستنزف طول الوقت.

ليه بنخلط بينهم؟

السبب هو التربية. أغلبنا اتربى إن التضحية الكاملة هي الحب، وإنك لو عملت حدود لنفسك تبقى مش أصيل أو بتاع مصلحتك. فبقيت تخاف حتى تهتم بنفسك لحسن تبان أناني.

وهنا المشكلة الكبيرة. لما كل مرة تفكر في نفسك تحس بالذنب، هتبدأ تهمل نفسك لحد ما تحترق نفسياً، وبعدها تتحول لشخص غضبان من كل اللي حواليه. بتساعد وانت متضرر، وبتدي وانت زهقان، وبعدين تلوم الناس إنهم استغلوك، مع إن انت اللي سمحت بده من الأول.

المجتمع الصح مش محتاج ناس تضحي لحد ما تموت، محتاج ناس طبيعية عارفة توازن بين اللي ليها واللي عليها.

طب نحب نفسنا ازاي صح؟

الموضوع محتاج قرارات واضحة:

اعمل حدود: الحدود مش سور بتبنيه عشان تقاطع الناس بيه، دي بوابة بتحمي بيها نفسك. لما تقول ايه اللي تقبله وايه اللي متقبلوش انت بتحترم نفسك واللي قدامك.

بطل تجلد في نفسك: كلنا بنغلط. اللي بيحب نفسه بيعرف يعاتبها بهدوء ويصلح الغلط، مش بيفضل يعاقب روحه سنين.

نقي دايرتك: مش كل الناس ينفعوا يبقوا في الصف الأول في حياتك، في ناس لازم تفضل بعيد شوية عشان تحافظ على سلامك النفسي.

استثمر في نفسك: اقرأ كتاب، العب رياضة، اقعد مع نفسك شوية وابعد عن آراء الآخرين ومفاهيمهم الخاطئة. دي صيانة ضرورية لروحك.

وفي الآخر السؤال الحقيقي مش انت بتحب نفسك ولا لأ.. السؤال هو: بتحب نفسك بالقدر اللي يحميك؟

لأن الحكاية كلها ميزان، لو مال هتتأذي في الحالتين.

والإجابة ببساطة:

١- لو ماحبتش نفسك هتتأذي: هتسيب حقك يضيع، وهتوافق على أي حاجة توجعك عشان ترضي اللي حواليك، هتفضل تدي وانت فاضي لحد ما تتحرق نفسياً، وساعتها لا هتعرف تساعد نفسك ولا هتعرف تساعد حد.

٢- ولو بالغت في حب نفسك برضو هتتأذي: ساعتها حب الذات هيتحول لأنانية، هتشوف نفسك الأحق بكل حاجة، هتتمنى اللي في إيد غيرك ليك، وتدوس على حقوق اللي حواليك وتتعالى عليهم، فالناس هتبعد عنك واحدة ورا التانية، وهتلاقي نفسك لوحدك وفاكر إنك كسبت وانت في الحقيقة خسرت كل حاجة.

الخلاصة: حب نفسك عشان تستاهل، بس حبها صح.. لا تظلمها بالإهمال، ولا تظلم غيرك بيها بالمغالاة.