نجم مانشستر سيتي يحلم باللعب في ريال مدريد - الهرم المصرى نيوز

 

*بقلم/ احمد السيد*

*العيد القومي لمحافظة* 

٦ يوليو ٢٠٢٦*

 

القاهرة بين الامس واليوم 

 

و أنت ماشي بالليل في شارع المعز، فيه لحظة كده بتحصل كل يوم تقريبًا ، هتلاقي حد وقف فجأة في نص الشارع، يبص لقدام ناحية المئذنة، يطلع موبايله، ياخد صورة، ويكمل طريقه تاني عادي

يمكن الصورة تتمسح بعد شويه ، لكن اللحظة نفسها بتقول حاجة مهمة جدًا: إحنا بنتعامل مع القاهرة كأنها خلفية جميلة، بينما الحقيقة إننا ماشيين جوه حكاية مش حيطه 

٦ يوليو ٢٠٢٦، و ده يوم مش عادي فيه القاهرة بتكمل ١٠٥٧ سنة بالظبط من اليوم اللي وضع فيه الجنرال جوهر الصقلي حجر أساس المدينة، يوم ١٧ شعبان ٣٥٨هـ الموافق ٦ يوليو ٩٦٩م. جوهر، القائد اللي خرج بجيش ضخم يقارب ميت ألف جندي، دخل الفسطاط من غير قتال تقريبا ، وبدأ يبني مدينة جديدة للخليفة الفاطمي ، و طبعا المدينة دي في الأول ماكانش اسمها القاهرة أصلًا، كان اسمها "المنصورية"، ولما وصل المعز لدين الله مصر بعد حوالي أربع سنين، هو اللي سمّاها "القاهرة"

وفي وسط كل الحقائق دي، فضلت حكاية شعبية الناس بتحب تحكيها كده , زي انهم بيقولوا إن جوهر كان مستني المنجمين يحددوا اللحظة المناسبة للتأسيس، فربط حبال بين قوائم خشبية وعلّق فيها أجراس، ولما ييجوا يدوه الإشارة تتحط أول الأحجار، لكن قبل الميعاد، غراب وقف على الحبال فرنت الأجراس، وكانت النجوم وقتها عند كوكب المريخ "القاهر"

 سواء الحكاية حصلت بالشكل ده أو لأ، فهي بتقول حاجة عن القاهرة نفسها: حتى بداية المدينة الناس أصرت تحكيها بطريقتها أو جت غلطة زي ما الحكاية الشعبية بتقول و فضلت فيها حاجه غلط

الغريب بقى إن المدينة اللي اتأسست في اليوم ده، ما اتعملتش عشان الناس تعيش فيها !

دي اتبنت على مساحة حوالي ٣٤٠ فدان، وكان القصر الكبير لوحده واخد حوالي سبعين فدان , سورها من الطوب اللبن كان عريض لدرجة إن فارسين يقدروا يمشوا فوقه جنب بعض. لكن الأهم من كل الأرقام دي، إن القاهرة كانت مدينة ملكية مغلقة. دخولها للعامة كان بإذن خاص. كانت أقرب لحصن كبير أو مقر للحكم منها لمدينة بالمعنى اللي إحنا نعرفه

آه ، الحقيقة... القاهرة اتبنت عشان تبعد الناس، والناس هي اللي خلّتها مدينة بعد قرون

يمكن دي أكتر مفارقة تستحق الاحتفال في يوم زي النهارده

المقريزي مثلاً لما حب يوصف القاهرة، ما اعتبرهاش بداية جديدة تمسح اللي قبلها. بالعكس، قال إنها "رابع موضع انتقل إليه سرير السلطنة"، بعد الفسطاط والعسكر والقطائع " وكأن المدينة المصرية عمرها ما كانت بتمسح نفسها وتبدأ من الصفر، لكنها كانت دايمًا بتضيف طبقة فوق طبقة، من غير ما تلغي اللي قبلها

ومع العصر الأيوبي حصل التحول الحقيقي اللي نحس بيه لحد النهارده ، القاهرة خرجت من حدود السور، والعامة دخلوا المدينة، وبقت عاصمة الناس، مش عاصمة الحاكم بس

 المدينة تمردت على رغبة اللي أنشأها. الشوارع امتلأت بالحركة، والأسواق بالحكايات، والبيوت بالأجيال. الأزهر، اللي اتبنى سنة ٩٧٢ كجامع للدولة الجديدة، خرج هو كمان من الدور اللي اتبنى عشانه، وبقى واحدة من أهم جامعات العالم الإسلامي. المباني، زي البشر، أحيانًا بتعيش حياة مختلفة تمامًا عن اللي اتخططلها

حتى العمارة الرسمية، الناس كانت بتعيد تفسيرها بطريقتها ، باب زويلة مثلًا، ارتبط في الوجدان الشعبي بالباب اللي دخل منه المعز، وبعدها بسنين طويلة بقى مكان ناس تدق فيه مساميرها وتعلّق عليه أمنياتها. المبنى فضل هو هو، لكن معناه اتغير لأن البشر استخدموه بشكل مختلف. يمكن دي أهم قدرة عند المدينة: إنها ما بتثبتش على معنى واحد

ولو بصينا للقاهرة النهارده، هنلاقي المفارقة كبرت أكتر بكتير , المدينة اللي اتعملت لخليفة وحاشيته فوق ٣٤٠ فدان، بقت محافظة فيها حوالي ١٠.٥ مليون إنسان، والقاهرة الكبرى كلها بقى فيها حوالي ٢٣.٥ مليون نسمة، أكبر تجمع حضري في الشرق الأوسط. الرقم ده مش مجرد إحصائية. ده دليل إن المدينة كسبت المعركة اللي ماكانتش مخططة تخوضها أصلًا

وعشان كده، وإحنا بنتابع مشروعات الإحياء اللي شغالة دلوقتي في القاهرة التاريخية، من درب اللبانة، لوكالة قايتباي، وبيت زينب خاتون، وأسوار القاهرة، ومئات المباني في القاهرة الخديوية، يمكن السؤال الأهم مايبقاش: الحجر هيرجع شكله إزاي؟

السؤال الأصعب هو: الحكاية هتفضل عايشة إزاي؟

لأن الترميم يقدر ينقذ جدار، لكن اللي حافظ على القاهرة ألف سنة وأكثر ماكانش الجدار وحده. كان البياع اللي فتح دكانه كل صباح، والطفل اللي حفظ طريق المدرسة، والجارة اللي بتنادي من المشربية، والصانع اللي ورّث صنعته، والناس اللي فضلت تضيف طبقة جديدة من الحياة فوق كل طبقة قديمة. دي كانت دايمًا الـ resilience الحقيقية للمدينة. القاهرة عمرها ما رممت نفسها بالحجر بس، لكنها كانت بترمم نفسها بناسها

يمكن علشان كده، كل مرة حد يقف في شارع المعز يرفع موبايله ويصور المئذنة، هو فاكر إنه بيوثق مبنى قديم. بينما الحقيقة إنه، من غير ما يقصد، بيوثق فصل جديد في نفس الحكاية اللي بدأت من ١٠٥٧ سنة... ولسه ما خلصتش

لو هتختار مكان واحد في القاهرة تحس إنه بيحكي المدينة بجد ، هيكون اكيد قرب مئذنة

القاهرة_١٠٥٧

قاهرة_المعز

حكايات_المدينة