الجانب المظلم من الطاقه الايجابيه متى تكون السعاده سامه - الهرم المصرى نيوز

 

 بقلم الأخصائية النفسية رشا عودة 

من الحاجات اللي بتخسر ضحية النرجسي حقوقها وبتضعف موقفها؛

هي طريقة سردها لمشاكلها مع النرجسي بشكل واسلوب خاطئ ؛؛

زي انها اول ماتتكلم مع معالج او قدام اهلها او قاضي عرفي او قاضي محكمه بتبدأ كلامها بجملة «اكتشفت (من سنه او سنتين حسب التوقيت اللي عرفت فيه مفهوم النرجسيه) ان جوزي نرجسي»!!

الجمله دي لوحدها كفيله تضيع حقك وتضعف موقفك وتعطي انطباع للي بيسمعك لو ماكانش حد واعي جداً وفاهم النرجسيه ومدي تأثيرها السلبي علي ضحاياهم ان جوزك كويس وانتي اللي فيه حد لاعب في دماغك ومحرضك عليه!! 

لأنها ببساطه بتعطيه انطباع ان حياتها كانت هاديه او عاديه بس لما تابعتي الناس خرابين البيوت اللي بيتكلموا عن النرجسيه والمواضيع الهدامه دي(من وجهة نظره)؛ 

 كرهتي حياتك وجوزك وبدات تظهر الخلافات والمشاكل بينكم،،

وبيبدأ عقل اللي بيسمعها أيا كان مركزه يتشمع ويتقغل تماماً ومايبقاش شايف ولاسامع حاجه من كلامها غير حقيقه وحده وهي إنها وحده اتلعب في دماغها ومتحرضه ضد زوجها ومهما قالت المسكينه وحكت عن مشاكل وضغوطات وظلم بتتعرض ليهم مش هيصدقها..

والحل هنا هو:

اولآ انك لما تتكلمي مع اي حد سواء طبيب او قاضي او حتي اهل لازم ماتكونيش حياديه ومنصفه اكتر من اللازم؛

 عشان شريكك النرجسي مابيهوبش ناحية الانصاف والحياديه وهو بيتكلم عنك بالعكس بيعمل إسقاط صريح بجميع افعاله الظالمه والحقيره عليكي ويتهمك بيها بمنتهي البجاحه والوقاحه ويعيش دور الضحيه المسكين المثالي المغلوب علي امره معاكي..

 فلما حضرتك تذكري مميزاته قبل عيوبه واللي هي مش مميزات أصلا وكانت عباره عن عسل مدسوس فيه سم بيفتح بيه وعيك واتزانك وليجعلك عاجزه عن فهمه وعن تحديد هويته،، وتبدأي كلامك بجملة (انك اكتشفتي انه نرجسي) دي أيضاً كارثه كبري لأنها بتعطي انطباع لاي حد بيسمعك الشخص اللي حضرتك متجوزاه زوج طبيعي جدآ وكويس معاكي وعنده مميزات كتير وبعض العيوب زي باقي الازواج بس انتي اللي انانيه وطماعه ومش عارفه قيمته ومشحونه بأفكار جديده وغريبه علي مجتمعنا هتخرب البيوت والأسر، وبعد مايسمعوا كلامه واتهاماته ليكي بعدم الاحترام ورفضه والتقصير في حقوقه ومش هيذكر لهم ميزه وحده فيكي؛ هيشوفوكي وحده ناشز مش عارفه قيمة الجوهره اللي في ايديها وحرفيآ هيبقوا مستخسرينه فيكي..

ثانياً ماتنطقيش كلمة نرجسي دي خالص لا لزوجك النرجسي ولا لأهلك ولاللقاضي عشان مجتمعنا الشرقي لسه غير مؤهل لانه يتفهم معني وصفات الكلمه دي وحقيقتها ولا مؤهل لانه يستوعب مدي خطورتها علي ضحاياها من الزوجات والابناء والمجتمع نفسه ف بلاش تقوليها افضلك واكتفي بقول انه مش طبيعي عايز كل حاجه وعكسها ومفيش شئ بيرضيه وبيتعامل معايا بطريقه محدش يتحملها ومع الناس بره ومع اهله بطريقه عكسها تماماً كأنه ملاك نازل من السما معاهم رغم ايذائهم واستغلالهم ليه،، ومعايا ومع اولاده بيبقي اسوء واخبث من الشياطين رغم حبي واحترامي ليه لحد ما جنني وعجزني عن ارضاءه وفهمه.

ثالثاً لما تتكلمي عنه قولي إنك كنتي بتحبيه وبتتمني انك تكملي حياتك معاه ويكون عوضك وسندك وانك من البنات اللي بتقدر الزوج والحياه الاسريه جدآ ((الكلام ده هيخلي القاضي او المعالج يحترمك ويطقطق دماغه ليكي ويحب يسمعك عشان يعرف ايه اللي وصلك من الحاله دي لحاله عكسها تماماً كدا ) وبعدين كملي كلامك بانك قدمتيله الحب والطاعه والوفاء والاخلاص والدعم المادي والمعنوي اللي وصله للنجاح اللي بقي فيه رغم انه ماكانش كويس معاكي واذكري كل عيوبه وتقصيره وخياناته بدون تردد ولكن اتظاهري بالخجل والاستحياء وانتي بتتكلمي عن المشاكل الحساسه عشان تنالي إحترام اللي بتتكلمي قدامهم ويصدقوكي وبعدين قولي انه عمل كل حاجه توصلك للحاله دي ويكرهك فيه وفي نفسك وفي الحياه بأكملها ده مش طبيعي ده عايز يتعالج والمصيبه انه شايف نفسه مفيش زيه وبينتقدني وبينتقد شكلي ومظهري وبيقلل مني ومن اهلي رغم انه عمل المستحيل عشان يتجوزني وبيتهمني انا بكل تصرفاته وخياناته وخبيث اووي في قلب الطرابيزه واستعطاف اللي بيشكيلهم مني لدرجة انه بيقنعهم بكذبه وبيخليهم يكذبوني رغم ان ربنا وحده يعلم بصدق كل كلمه بقولها انا وبكذب كلمه هو بيقولها وبيتهمني بيها انا عايزه ابعد عنه عشان احمي اولادي لانه بدأ يحرضهم ضدي وبداوا يبقوا زيه واللي مش زيه بقي شبه متعقد من كتر الضغوط والمشاكل والزعيق في البيت وتعنيفه وض.ربه ليا قدامهم ده مش وضع آمن ليهم ولا ليا أبدآ بس مش مهم انا المهم هما،

انا كنت متحملاه عشانهم بس اكتشفت ان وجودي معاه خطر عليهم اكتر من بعده عنهم..

الكلام ده اللي مفروض تقوليه لأي حد بتطلبي منه التدخل او التحكيم بينك وبين النرجسي عشان يفهم مدي سوء الوضع اللي بتعيشيه مع الكائن ده ويفهم انه كذاب ومتلون عشان مايتخدعش فيه ويصدقك..

اتمني تتفاعلوا مع المقال عشان يوصل لكل ضحية نرجسي وتعرف تعبر عن مابداخلها في وصف المضطرب الخبيث اللي في حياتها عشان ماتخسرش دعم ومساندة اللي حواليها ولاتخسر حقها وحق اولادها.