بعوضة… وحقيقة أكبر منّا

بقلم: هديل أبوضيف

مَاتَ أبو جهل وعاش الجهل يتيمًا، حتى تَبَنَّاهُ سفهاء هذا الزمن..!

وقد قال العراب خالد توفيق في هذا: "نحن نعيش وسط أعبط مجموعة بشرية وُجِدَت على الإطلاق"... 

في الواقع، في عصرنا هذا، أصبح العقل ثقيلًا جدًّا على أصحابه، أما خِفَّة التفاهة فتجعله يَطير.

وأصبحنا نعيش أزهى عصور النجاحات الوهمية بسبب ما يُسمى "السوشيال ميديا". وتبسيطًا لما أريد التحدث عنه، أذكر أبسط مثال على النجاحات الوهمية: "بلوجرز التيك توك". حيث أغلبهم وليس جميعهم هم عاهات هذا العصر، فهم عبارة عن ناس ( لمؤاخذة يعنى ) تَقْعُدُ تَتَشَقْلَبُ وتُصَوِّتُ وتَتَجَوَّزُ وتُطَلِّقُ وتَرْقُصُ، وأفعال غير أخلاقية نهائيًّا....

 و متقولش : "دا مصدر رزق"؛ لأن الرزق يكون بالكد والتعب، ونتاجه عمل يفيد الناس. لكن الذين يُسَمُّونَ أنفسهم "تيك توكرز" ويعتبرونها وظيفة، هم مثال سيء جدًّا خارج مصر، ويُقال عن هؤلاء الناس إنهم "شحاتون".

صحيح لا توجد مشكلة في أن تَفْتَحَ باب رزق عن طريق السوشيال ميديا؛ بَسْ فِدِ الناس. اعمل محتوى هادف؛ أيًّا كان المحتوى (زراعي، تجاري، فني، قضائي، تاريخي، سياحي)، اعمل أي حاجة محترمة تُزَوِّدُ الناس بمعلومات أو معرفة... 

لكن إيه الفائدة من أن تطلع واحدة مفيش عندها محتوى أصلاً تقول: "إخواتي ادعموني وكبسوا كبسوا" وتقعد تَعَيَّطُ؟!!

 دا اسمه تسوُّل إلكتروني. والى بيقول: " دول ناس غلابة"، الغلابة يكسبوا رزقهم بِعَرَقِ جبينهم!!!!!

كلنا بنشوف سيدات كبيرة في السن بتبيع خُضرة، وولد صغير يبيع مياه معدنية في إشارة المرور، وعامل توصيل فى طريقه لتوصيل طلبية في عز حر الصيف أو شدة برودة الشتاء وتحت الأمطار ، وغيرهم وغيرهم كتير ....

من إلى بيشقوا على لقمة العيش الحلال، بالرغم من أن الطفل أو السيدة الكبيرة في السن غير مطلوب منهم عمل فى هذه المرحلة العمرية ، لكنهم لم يَسْتَسْهِلُوا؛ ولم يَظهروا على التيك توك يَصْرُخُونَ للناس ويقولون: 

"كبسوا كبسوا..."

وللعلم، هؤلاء البلوجرز ممن أستسهلوا طريقة كسب عيشهم عندما يَشْتَهِرُونَ رغم تفاهة محتواهم، ويصبحون أثرياء بسبب ما قدموه من تفاهة، يكون هذا من أقوى مسببات عدم الرضا والتمرد على العيشة لمن يتابعونهم؛ لأنهم أصبحوا أثرياء بدون آى تعب أو مجهود وبالتالي يقلدونهم. وهنا يحدث الغزو، غزو البلوجرز والتيك توكرز.....

 "غزو البلهاء" بتعبير أمبرتو إيكو، حيث أتاحت وسائل التواصل للحمقى الحديث وكأنهم علماء.

ففي زمن التفاهة، أتاحت وسائل التواصل الاجتماعي للأغبياء من الناس فرصة التعبير عن سخافتهم أمام الملأ وبالطريقة التي تناسبهم، ويتصدرون المشهد في التفاعلات والمتابعة والمشاهدة.

يقول أمبرتو إيكو: "أدوات مثل تويتر وفيسبوك تمنح حق الكلام لفيالقٍ من الحمقى، ممن كانوا يتكلمون في البارات فقط بعد تناول كأس من النبيذ، دون أن يتسببوا بأي ضرر للمجتمع، وكان يتم إسكاتهم فورًا. أما الآن فلهم الحق بالكلام مثلهم مثل من يحمل جائزة نوبل... إنه غزو البلهاء."

(تخيل بقى أمبرتو إيكو لو كان كتب عن التيك توك والى بيحصل دلوقتى اكيد كان هيتصدم من هول إلى شافه!!!!!!)

وذلك بارز أيضًا في الكتاب الشهير "نظام التفاهة" للكاتب والفيلسوف "آلان دونو"؛ حيث قدم تحليلًا عميقًا وشرحًا مفصّلًا لمحددات نظام التفاهة وآليات حدوثه، مُنَبِّهًا من العواقب الناتجة عن سيطرة التافهين وتركزهم في جميع الميادين.

يقول آلان دونو: "إن التافهين قد حسموا المعركة لصالحهم في هذه الأيام، لقد تغير الزمن؛ زمن الحق والقيم، ذلك أن التافهين أمسكوا بكل شيء، بكل تفاهتهم وفسادهم؛ فعند غياب القيم والمبادئ الراقية، يطفو الفساد المُبَرْمج ذوقًا وأخلاقًا وقيمًا؛ إنه زمن الصعاليك الهابط".

ويضيف أنه كلما تَعَمَّقَ الإنسان في الإسفاف والابتذال والهبوط، كلما ازداد جماهيرية وشهرة.

وحسب الكاتب، نجحت مواقع التواصل الاجتماعي في ترميز التافهين، "حيث صار بإمكان أي جميلة بلهاء، أو وسيم فارغ أن يفرضوا أنفسهم على المشاهدين، عبر عدة منصات تلفزيونية عامة، هي أغلبها منصات هلامية وغير منتجة، لا تخرج لنا بأي منتج قيمي صالح لتحدي الزمان...!!"

ويشير آلان دونو إلى أنه "من حق السخفاء والحمقى والمهابيل أن يكتبوا ما يشاؤون على مواقع التواصل التي ساوت بين المثقف والجاهل. هذا حقهم ولا أحد يستطيع أن ينازعهم فيه أحد، لذلك الحق ليس عليهم مطلقًا بل على كل من يهتم أو يعلق أو يرد على ما يكتبون." فإن تظل متفرجاً لمسرحية سخيفة، يعني أنك منحت العبث حق البقاء...

لذلك كُنْ حكيمًا، فمن الحكمة والنضج ألّا تشارك العابثين عبثهم، فكل مشهد تافه لا يليق بك يسرق من وقتك شيئًا لا يُعوَّض.

ومن كتاب "نقطة الغليان" للدكتور مصطفى محمود رحمه الله:

 "هذا شأن العالم دائمًا منذ خمسة آلاف سنة؛ كانت الراقصة تكسب أكثر من الكاتب، والطبّال يكسب أكثر من الخباز والنجار والحداد. ولو أنك دعوت أينشتاين اليوم لندوة علمية، ثم دعوت امرأة عارية لحديث صحفي، لترك الجمهور أينشتاين وعِلْمَهُ واحتشد حول المرأة العارية بالألوف. وهذا ليس ذنبنا، وإنما سببه أن أكثر الناس من البهائم وأهل الهوى وعبيد الشهوات. ولذلك، هم يشجعون التافه من الأمور وينصرفون عن الجاد."

وأقتبس أيضًا من رواية "العلاج السري" لمعتز نادي التالي:

 "يبدو أن شهوة التريند تقود الجميع دون عقل أو تروٍّ."

"الكل يَلْهَثُ في ساقية بل طاحونة تدمِّرُ ما لديهم من بقايا تفكير..."

كما أقتبس عن أحد الحكماء: "إما أنَّ هذا المجتمع لا يملك الوعي، أو إنه لا يستخدم العقل الذي مُيِّزَ به الإنسان عن بقية الكائنات الحية وتخلى عنه، ومستمتع بحياة القطعان البشرية."

"مشكلة القطيع ليس مع الراعي ولا مع الذئب، مشكلة القطيع أنه قطيع..."

** (و رأى شخصى لى إن القطيع 

مش بس القطيع إلى تابع وشجع لكن القطيع إلى فضّل الصمت وموقفش ضد التفاهة 

لأن "الصمت في حضرة السخافة ليس حكمة ؛ بل استسلام و خزى")

وبعد قراءة هذه المقتطفات المُقْتَبَسَة من كتابات الكُتاب والمفكرين والفلاسفة السابق ذكرهم لتوضيح مستنقع التفاهة الذي وصل له المجتمع:

 لسه مفكرتش تسأل نفسك ليه المحتوى التافه ده بينجح وينتشر؟!

هل عشان كل اللي بيتابعوه تافهين؟ لا.

هل عشان المنصة مش بتدعم المحتوى ذو القيمة وبتدعم التفاهة فقط؟ لا.

هل عشان طبيعة شعبنا كوميدي بالفطرة وحاليًا الكوميديا اختلطت بالتفاهة؟ لا.

سؤال عميق ومهم جدًّا، الإجابة ببساطة: عشان العقل البشري يميل تلقائيًا للحاجة السهلة والمسلية والمُشْبِعَة لغريزته اللي بتخليه يهرب من الواقع، مش يواجهه.

خليني أوضح لك أكتر:

 * المحتوى السهل يكسب بسرعة: الدماغ لما يكون تعبان من شغل أو دراسة أو ضغط، مش هيقبل بسهولة محتوى ثقيل فيه معلومة أو فكرة معقدة. هيدور على حاجة تضحكه، تسليه، تخليه يحس إنه "هرب" شوية من اللي هو فيه... فالكوميديا غير الهادفة أو التفاهة بتدي إحساس الراحة المؤقتة.

 * خوارزميات المنصات بتحب اللي بيشد الناس بسرعة: الحاجة اللي بتخلي الناس تقعد أكتر، تعمل لايك وكومنت وشير، هي اللي بتتاخد وتتحط في الوش. وده بيحصل أكتر مع المحتوى الخفيف اللي للأسف في الغالب بيبقى تافه، لأنه بيوصل لقلب الناس بسرعة، بعكس المحتوى القيم اللي محتاج وقت وتركيز.

 * مش كل الناس تافهة... بس كل الناس بشر: ساعات بيكونوا مُنْهَكِينَ ومحتاجين لحاجة تخف عنهم... فبيروحوا للحاجة السريعة، الظريفة، اللي بتخليهم يضحكوا شوية، حتى لو اللي بيقدمه إنسان تافه، بس برضه بيشوفه فده طبيعي.

 * الكوميديا سلاح، بس في ناس بتستخدمه غلط وربطته بالتفاهة... الكوميديا ممكن تكون ذكية، هادفة، بتوصل رسالة قوية، بس للأسف في نوع كتير منها اتجه للسطحية والبذاءة والإسفاف عشان يجيب مشاهدات أسرع... وهنا بيبقى في فرق بين "تفاهة" و"كوميديا هادفة".

يعني الخلاصة: الناس بتدور على مهرب، والعقل يفضِّل السهل، والمنصات بتشجع السريع... عشان كده التافه بينتشر. والانتشار بقى اسمه "تريند"، والتريند الكل يتداوله (يشاركوه). والتريند يفضل ينتشر ويتوغل ويستمر، وينتشر ويتوغل ويستمر .....

 وكله يقلده ويمشي وراه زي القطيع. طبعًا كان اسم تقليد الكل لشيء "المشي وراء القطيع"، بس دلوقتي اسمه "تريند". بقت المعادلة هي: التريند = الشهرة = ثراء سريع.

وللتوضيح أكتر وأكتر لكل ما سبق وعلى بلاطة كده:

البلوجرز كل همهم التريند اللي هيكسبهم الفلوس. هتلاقي كل يومين واحد منهم عاوز ياخد الأضواء، فيعمل أي حاجة حتى لو غلط أو بذيئة وحتى لو حرام لمجرد الظهور والشهرة وبس!

مثلًا: البنت اللي بتستظرف وتستخف دمها وتعمل حركات مُنَفِّرَة غير أخلاقية أمام الكاميرا، أو زي إنها تعمل حركات بوشها أو تأكل بطريقة مقززة، أو تتكلم بصوت رجل، أو تتلفظ بألفاظ بذيئة ظنًّا منها أن دمها خفيف كده، بيكون شكلها بصراحة مقزز (وأعتذر للفظ لكنه المناسب لهذه الفئة). والبلوجرز اللي بيروحوا حفلات ومصايف وسفر وسهر وفيديوهات بدون حياء ولا أدب، ونماذج سيئة بتسمي نفسها "صانع محتوى"، وفجأة تلاقيهم على الشاشات وبيمثلوا، وقدوة كمان لجيل طالع.

ولا البلوجرز اللي بيحيوا زمن الغجر والغوازي والنور (بفتح النون والواو) اللي كان رزقهم من الموالد والأفراح وقراءة البخت والودع والعُهْر (بضم العين)، ودلوقتي بعد ما أعدادهم كترت ودابوا بين الناس مبقوش معروفين للأجيال اللي طالعة، إنما الناس القديمة والناس اللي لسه عندهم مبادئ عارفينهم كويس وبيميزوهم أول ما بيظهروا على التيك توك والميديا عمومًا، بيكونوا بدون أدنى درجة من درجات الحياء والخشى؛ اللي متعَرِّية وجوزها جنبها بيسقف لها، واللي ابنها جنبها وتتلفظ أمامه بألفاظ هادمة لطفولته، وأشباه رجال، ولايڤات' بث مباشر 'من البيوت بتفاصيلها بالأكل والشرب واللبس؛ واختفاء ما يُسمى "حُرْمَة البيوت"؛ بالضبط كأنك تمر بجوار صندوق قمامة في الطريق...

أو مثلًا نوع تاني من البلوجرز، ودي ماسورة المجاري اللي طَفَحَت في مصر واسمهم "فوود بلوجرز"، وبيرموا جتتهم على المطاعم عشان ياكلوا وياخدوا فلوس لمجرد بس إنهم عندهم متابعين كتير. دول ما يقال عنهم شوية : (عواطلية - متسولين - شغلانة اللي ملوش شغلانة)

المتابع استفاد إيه لما تدخل مطعم وتأكل وتقعد تنتقد الأكل ولا توصف في حلاوته وجماله ماهو عارف إنك قبضت فلوس عشان تقول الكلام ده!!! هل هو كده أخذ معلومة مهمة موثوقة مثلًا؟ هل هو كان مستني حضرتك تساعده يختار المطعم اللي هياكل فيه النهاردة ودي كانت أكبر مشاكله في الحياة؟!

هم أصلًا البلوجرز اللي بيطلعوا ينصحوا الناس في أي حاجة، (حتى غير الأكل)، ويحكوا تجاربهم، دول إيه مؤهلاتهم والمفروض ناخد كلامهم عبرة على أساس إنهم مين وعايزين إيه؟!!!! 

أنا بالنسبالي إن أغلبهم وليس جميعهم عبارة عن لا شيء...

ولا كمان الفيديوهات إلى بيعملوها تحت مسمى "تحدي الطعام" دا سلوك مقزز وغير إنساني، في عالم يعاني فيه ملايين البشر من أزمة غذاء ولكن احنا في عالم لا يعترف إلا بأرقام المشاهدات وصناعة المحتوى "التافه".

و كمان من غرائب تصرفات البلوجرز والى بيقولوا على نفسهم مؤثرون عرب ( إنفلونسر) إقامة حفلات ضخمة زى حفل خطوبة أو زفاف وبيكون مكلف أكثر من احتفالات الأمراء ودا طبعاً عشان يكون الحفل تريند الموسم، كل همهم بس نشر حياتهم ومن تزوج فلانة ومن تزوجت فلان وحياة تافهة وفارغة من أجل برضه التريند. ولو بعد الخطوبة والجواز الريتش عندهم وقع يقرروا يطلقوا... ويرجعوا لو الريتش رجع، ولو ما رجعش يجوزها لغيره، مش فارق معاهم الناس تحبهم... تهز.أهم مش مهم... المهم يبقوا تريند... المهم المشاهدات...

حرفيّاً الحديث عن البلوجرز فكرني بمشهد في فيلم "المنسي" لما راجل قال لعادل إمام: "يا أخينا خد الولاعة" عشان يكمل اللي بيعمله في الحفلة بتاعتهم، مع إن اللي كان بيعمله كان غلط، بس في أوقات كده استثنائية جدًّا جدًّا الفعل فيها بيكون غلط بس المفعول به يستاهل، فمحدش بيبقى عايز يوقف الفاعل، وده شعوري وأنا بتفرج بالصدفة البحتة أثناء مشاهدتي ريلز الفيسبوك على فيديوهات التيك توكرز، بصراحة بكون عايزة أعمل فيهم زي ما كان عايز يعمل عادل إمام 

" ي و ل ع فيهم " ....

طيب ما دام البلوجرز بيكسبوا كده من التفاهة، ما كل الناس تسيب شغلها بقى والطلاب يسيبوا مذاكرتهم ونفتح كلنا لايفات ونقعد ناخد الأسد والحوت والحاجات الغريبة دي!

بس طبعًا كلنا عارفين إن كل ده غلط، الإنسان سيرة ومش هيفضل منه غير الأثر اللي بيسيبه في حياة الناس.

صحيح في مواقع التواصل الاجتماعي يمكن أن يخفي اسمك الحقيقي، وعنوانك ورقمك، ولكن لا يمكن أن يُخْفِي تربيتك وأخلاقك. أسلوبك يظهر إذا كنت إنسان محترم، أو ليس محترمًا. تظهر سماتك من أسلوبك، فتأكد أن أهم معلومة شخصية لك بمواقع التواصل هي أسلوبك وأخلاقك مع الآخرين. تربيتك وأسلوبك وأخلاقك هما عنوانك الحقيقي لكسب احترام الناس وحبهم. هذا المكسب الأهم في مواقع التواصل وأهم من التريند وأهم من فلوس المشاهدات.

قال الله تعالى: "{فَأَمَّا الزَّبَدُ فَيَذْهَبُ جُفَاءً ۖ وَأَمَّا مَا يَنفَعُ النَّاسَ فَيَمْكُثُ فِي الْأَرْضِ}" (الرعد: 17).

فكر إنك في الآخرة هتبقى واقف قدام ربنا وهتتسأل عن عملك في الدنيا، هتقوله إيه ساعتها؟

يمكن فعلًا احنا في زمن التفاهة والتريندات ولايفات التيك توك، بس ده مينفعش يخليك تيأس أو تحبط من أي حاجة، كمل اللي بتعمله وما تفكرش في أي حاجة غير إنك لازم تسيب أثر ينفع اللي حواليك.

وخليك فاكر إنك مُطالب بالسعي مش بالنتيجة، ربنا سبحانه وتعالى بيقول: "{وَأَن لَّيْسَ لِلْإِنسَانِ إِلَّا مَا سَعَىٰ * وَأَنَّ سَعْيَهُ سَوْفَ يُرَىٰ * ثُمَّ يُجْزَاهُ الْجَزَاءَ الْأَوْفَىٰ}" (النجم: 39-41). كل اللي عليك إنك تسعى وتسيب الباقي على ربنا، هو هيجازيك.

الدنيا دي كلها ولا حاجة والله، ما تساويش جناح بعوضة حتى، عشان ننْبَهَر بها!

رجاءً، وَقِّفُوا متابعة البلوجرز، والكلام عليهم، والانبهار بهم.

لأن والله، أنتم أول ناس تتضررون من متابعتهم، لأن المحتوى المتدني يتربَّح على حساب عقولنا وأخلاقنا!

إينعم الإنترنت أصبح جزءًا من حياتنا وعملنا ، وكل يوم يمر نتعرض لكمية ضخمة من المحتوى؛ ويوجد فيه ما يعلمنا ويرفع وعينا، لكن للأسف يوجد أيضاً الكثير الذي يضيع الوقت ويهدم القيم، ويؤثر على أخلاق الشباب والمجتمع كله...

مشاهد غير لائقة، أفكار تافهة، وتريندات تدفع الناس لتصرفات غريبة، كل ده بيسيب أثره على العقول، وبيخلي الهابط هو المسيطر!

المشكلة مش بس في اللي بيقدم المحتوى، لكن كمان في اللي بيتابعه وبيشجعه لأن كل ما شاهدت فيديو تافه أو شاركته، فأنت تساعد على انتشاره، وتوصل رسالة إن النوع ده مطلوب...

وربنا سبحانه وتعالى قال: "{وَلَا تَقْفُ مَا لَيْسَ لَكَ بِهِ عِلْمٌ ۚ إِنَّ السَّمْعَ وَالْبَصَرَ وَالْفُؤَادَ كُلُّ أُولَٰئِكَ كَانَ عَنْهُ مَسْئُولًا}" (الإسراء: 36)، يعني كل حاجة بنتابعها هنسأل عنها يوم القيامة

والحياة أقصر من أن تهدرها في تصفيق لا يشبهك.

أما صناع المحتوى، فمسؤوليتهم أكبر؛ لأن اللي بيقدموه بيأثر في ملايين، خاصة الشباب اللي لسه بيتشكل فكرهم.

سيدنا النبي ﷺ قال: "من دعا إلى هدى كان له من الأجر مثل أجور من تبعه، ومن دعا إلى ضلالة كان عليه من الإثم مثل آثام من تبعه" (رواه مسلم). يعني كل فيديو أو بوست بينزل، إما في ميزان حسناتك، أو عليك وزره ووزر اللي تأثر بيه.

فليه ما يكونش المحتوى إضافة حقيقية تفيد الناس وتسيب أثر طيب؟

وفي النهاية، نصيحة لكل إخواني وأخواتي اللي بيتابعوا البلوجرز ذات المحتوى التافه:

🚫 ما تتابعوش الناس دي يا جماعة.

🚫 ما تتكلموش عن البلوجرز يا بنات، وعن الشو اللي بيعملوه عشان يبقوا تريند.

أنتم الجانب المهم في المعادلة.

أنتم اللي تقدروا توقّعوا الناس دي، أو تشهروهم وتخلوهم تريند!

"لا تكونوا سبب في نشر التفاهة!"

انتم اللي بتصنعوا الفساد بإيديكم وترجعوا تقولوا المجتمع باظ وبقى تافه ليه

تخيل أنك في يوم القيامة، ورأيت في صحيفتك آلاف الإعجابات والمشاركات لمنشورات لا قيمة لها، أو حتى سيئة، بينما كنت تستطيع أن تملأها بما ينفعك. تخيل أن كل تفاعل منك كان سبب في انتشار محتوى هابط، وفي المقابل، كنتَ تستطيع أن تدعم العلم، الحكمة، والدين.

كم من شخص تأثر بمنشور تافه لأنك دعمته؟ وكم من فائدة ضاعت لأنك لم تهتم بها؟

اختر ما يدوم لك بعد موتك، وليس ما يُسلِّبك للحظة ثم يختفي. التغيير يبدأ منك، فلا تكن مجرد متابع، بل كن صانعًا للوعي.

أوعوا تنْبَهِرُوا بيهم:

لا بالسعادة اللي بيمثلوها في فيديوهاتهم،

ولا بالعربيات آخر موديل،

ولا بالفرح اللي شكله إيه بتاعهم،

ولا بالميكب ولا اللبس.

وقت الجد مش هينفع بلدنا غير مهندسينها ودكاترتها ومبدعيها وعلمائها وأولادها المتعلمين، هم اللي هيساعدوا ويبنوا البلد، مش هيقولوا: "كبسوا كبسوا...".