الخداع الإعلاني… هل هو ذكاء تسويقي أم خسارة مؤجلة؟ - الهرم المصرى نيوز

 

بقلم:إسراء أحمد راجح 

اخصائي نفسي اكلينيكي 

كل يوم بنصحى نفتح موبايلنا،نعدي بسرعة علي الانستجرام والتيك توك وسناب شات ونشوف وجوه بتضحك،سفر،نجاحات،عرايس في شهر العسل،شباب بيبدأوا شركاتهم الخاصة وناس بتشتري بيوت وعربيات.

وفي وسط كل دا بنلاقي نفسنا بنسأل من غير صوت :هو انا متأخر؟ هو في اي غلط فيا؟!

والاسئلة دي مش بريئة دي بداية طريق طويل من المقارنة 

مقارنات سلبية بتاكل في ثقتنا بنفسنا وبتخلينا نكره واقعنا ونشك في قيمتنا.

وخلينا نقف هنا شوية ونسأل نفسنا السوشيال ميديا حياة حقيقية ولا فيلم قصير؟

اللي بنشوفة علي السوشيال ميديا مش دايما كذب لكنة مش دايما الحقيقة الكاملة

ناس بتشارك اللقطة الحلوة ،اللحظة اللي فيها ضحك أو إنجاز ،مش بتشارك التعب والانهيار والفشل .

وزي ما قال عالم النفس ليون فيستنجر :" الإنسان بيقارن نفسه تلقائيا باللي حوالية علشان يفهم هو فين"

بس لما تكون المقارنة مبنية علي لقطات مش كاملة بتبقي مقارنة ظالمة.

البلوجر اللي كل يوم بتضحك وتصور محتوى مش لازم تقولك إنها بتاخد علاج نفسي.

وصاحب المشروع اللي بيتكلم عن النجاح مش هيقولك إنة خايف يفلس الشهر الجاي.

وانا هنا مش قصدي أقول إن اللي بتشوفة دايما مزيف بس مش دايما صادق ولا صورة كاملة.

التوقعات اللي بتخنق جيل كامل زي جيل العشرينات دلوقتي توقعات إن لازم اكون ناجح ومحبوب ومرتاح نفسيا وبسافر مرة في السنة علي الاقل.

لكن الحقيقة والواقع مختلف تماما وفيه تعب وشك وحيرة .

ألبرت إليس مؤسس العلاج العقلاني الانفعالي قال "المعتقدات غير المنطقية عن أنفسنا هي السبب الرئيسي في معاناتنا النفسية"

احنا صدقنا إن السعادة ليها شكل واحد ،وان اللي مش سعيد طول الوقت اكيد في حاجة غلط ،صدقنا إن كل الناس ماشية اسرع مننا وأننا لازم نلحق والا هنفوت القطر.

في زمن الصورة الحلوة والفلتر بقي سهل نغطي علي الالم ،ناس كتير بتضحك على الشاشة وتعيط في اوضتها ،ناس بتحفزك بكلام عن "عيش اللحظة" وهما مش قادرين يناموا من التفكير.

متخصصة العلاج باليقظة تارا بروك قالت"المشاعر اللي مش بنعبر عنها بتتحول لالم ساكت"

وفي الحقيقة الألم الساكت دا في جيل العشرينات بقي بيظهر في صور كتير زي اكتئاب لابس قناع النجاح ،قلق من كل حاجة حتي الحاجات الصغيرة ،جلد للذات طول الوقت ، احساس بعدم الكفاية مهما عملنا .

السؤال هنا دلوقتي احنا فين وسط دا كلة؟

احنا مش فاشلين ولا متأخرين ولا اقل من غيرنا.

احنا بس بنقارن نفسنا بصورة مش كاملة وننسي رحلتنا الحقيقة اللي فيها معاناتنا وظروفنا اللي بتثبت كل يوم أننا ابطال .

الحل مش أننا نهرب من الواقع ولا نكرة النجاح الحل أننا نعرف معني النجاح الحقيقي ،ونفهم إن لكل واحد فينا توقيت مختلف وظروف مختلفة وطريقتة الخاصة. عالم النفس فيكتور فرانكل كان بيقول " حتي في اقسي الظروف الإنسان يملك حرية اختيار طريقة رؤيته لها"

نصائح صغيرة من حد شبهك:

قلل وقتك علي السوشيال ميديا أو علي الاقل خليك واعي وانت بتتفرج.

اسال نفسك كل مرة الصورة دي حقيقه كاملة ولا جزء من حاجة اكبر؟!

اتكلم متكتمش مشاعرك اتكلم مع حد قريب منك او مختص نفسي او حتي في ورقة.

الاهم اعرف انك مش متأخر بس ماشي بسرعة مناسبة لظروفك ووضعك وأننا مش لازم نكون شبة بعض ولا لازم نعيش حياة مثالية طول الوقت.

المقارنة مزيفة،الفلاتر خادعة.... لكن حقيقتك ببطئها وتفاصيلها وتقلب مشاعرك تستحق التقدير.