الأهلي يكتسح الزمالك بثلاثية نظيفة ويشعل صراع القمة من جديد - الهرم المصرى نيوز

 

 بقلم /ميرنا درويش

   طول عمرنا بنبص علي نص الكباية المليان ،  بدون وعي و بشكل تلقائي ،اي حد بيشعر و لو بجزء بسيط من الاحباط بيجري يبص بسرعة علي نص الكباية المليان كنوع من أنواع المسكن سريع المفعول لمشاكله ..

 بس عمرك فكرت ليه بنبص على نص الكباية المليان اصلا ، أو ايه الهدف من فعل زي دة ؟

 عمرك حاولت تفهم ايه هو نص الكباية الفاضي اللي كل الناس مهمشينه و محدش جايب سيرته نهائي دة ؟؟

عمرك فكرت ايه هي الكباية اصلا ؟؟!

الكبايه المليانه لنصها....نصها مليان ونصها فاضي ..

ممكن واحد يقول عليها كبايه نصها فاضي ، وواحد تاني يقول كبايه نصها مليان.. وكل واحد و نظرته للحياة ...فاهمني ؟

يعني في ناس بتميل انها تشوف العيوب في الحاجات اللي حواليها وماتشوفش الحاجات الحلوه زي مايكون عنيها بتختار اللي تشوفه واللي ماتشوفوش،  و في ناس بتشوف المستقبل مليان بالمشاكل وناس بتشوف إن المستقبل ممكن يبقي مليان بالفرص حتي لو فيه مشاكل ، في ناس بتشوف إن الناس أساسا كويسه لكن فيها عيوب وناس بتشوف إن الناس اصلا وحشه والحاجات الكويسه دي استثناءات..

دايما في أذهاننا نص الكباية المليان مرتبط بشئ إيجابي و النص الفاضي مرتبط بشئ سلبي ، المتفائل بيبص علي النص المليان و المتشائم غرقان في النص الفاضي ...

احب افاجئك و اقولك ، أن العكس تماما هو اللي صح ، و المفاجأة الأكبر أن النظريتين غلط اصلا ..خدت الصدمة صح .. هقولك ازاي ..

اللي بيبص دايما علي نص الكباية المليان ، أو بمعني أوضح بيركز دائما علي الحاجة اللي عنده و علي الإيجابيات فقط، دة شخص في الأساس معندوش رضا كفاية ، فبيدور طول الوقت أنه يثبت لنفسه أنه بيمتلك حجات كتير كويسة و يقعد يحسب النعم عشان يطمن نفسه أنه احسن من غيره و خلاص ، و لكن من جواه بيبقي بيستخدم اسلوب تمويه لعقله بيقنع بيه نفسه أنه مبسوط و راضي ..و الحقيقة أنه لو راضي مكنش ركز مع النص المليان اصلا ..و بعدين عمرك شفت حد مستكتر النص المليان و حاسس أنه في فيض من النعم ..لا ...والا مكنش شافه نص كباية بس ..ولا ايه ..

من قبل م تسأل ..اللي بيبص علي النص الفاضي هو الصح ؟ برضو لا..

اللي بيبص علي النص الفاضي دة مش شخص متشائم ، و لكنه شخص فاشل ، بيدور علي اي شماعة يعلق عليها خيباته المتكرره ، حجة بتساعده يبرر لنفسه كسله و يبطل يسعي و ينام و يأنتخ بحجة أنه كدة كدة أنا أقل من غيري و معنديش حاجة و خلاص .. ناس بتميل تشوف الجزء الناقص من الحياه...الحاجات اللي مش عندهم  والحاجات اللي محتاجنها ومش بيشوفوا الحاجات اللي عندهم فتكون النتيجه الطبيعية للتفكير دة يأس وأحباط..

طب لما دة مش صح و دة مش صح ..مين اللي صح ؟!

كلنا مشغولين بنص الكباية و خلاص ، سواء كان فاضي أو مليان ، و عمر ما حد فكر في الكباية نفسها ، الكباية اللي هي في الواقع انت ... انت الكباية اللي نصها فاضي و نصها مليان ، و كونك تختار تبص أو تركز مع جزء واحد من الاتنين ف أنت كدة بتهمش جزء تاني منك ، جزء لا يقل أهمية عن الجزء اللي انت مركز معاه ...و كونك مركز مع جزء واحد سواء مليان أو فاضي يدل علي انك غير راضي عن الجزء التاني ..فبالتالي انت شخص غير راضي عن حياتك ..

معظمنا بيبص دايما لنص الكباية الفاضي بنظرة سلبية جدا محطمة ، نظرة سوداوية كل الهدف منها انك تشاور لنفسك علي اللي ناقصها و اللي مفتقداه و اللي مش عندها ، و لكن خليني اثبتلك حاجة بسيطة ، تفتكر من غير النص الفاضي دة عمرك كنت هتشوف النص المليان اصلا ؟ 

تفتكر لو كانت الحياة كلها مفيهاش غير خير و نعم و سعادة و حب كنت هتحس بقيمتها ؟ 

الكره ، الفقر ، المشاكل ، النواقص ، النقم اللي في حياتك هي المسئول الأول و الأساسي عن احساسك بقيمة النعم اللي في حياتك و تقديرها ، لولا المرض عمرك ما كنت هتفهم قيمة الصحة ، لولا الفقر عمرك ما كنت هتحافظ علي الفلوس و تصرفها بحكمة ، لولا وجع القلب مكنتش روحك عمرها هتنضج و تحكم العقل و القلب بعد كدة على حد سواء من غير م يغلب حد فيهم التاني ، هتحس بالشبع ازاي لو عمرك م جربت اصلا احساس الجوع ؟!

كبايتك مليانة برزقك اللي مكتوبلك و اللي عمره ما هيبقى شبه كباية اي حد تاني ، كبايتي مليان نصها بنجاح و ثقافة و قصادها في النص الفاضي فقدت شخص عزيز على قلبي، كبايتك نصها مليان بقرب من ربنا و قصاده مرض في النص الفاضي ، كبايته نصها مليان بعيلة و دفا و نصها الفاضي بقلة حظ في الشغل أو في الفلوس ، هل دة معناه اني احسن منك ولا انت احسن منه ولا حد فينا احسن من التاني ؟..لا اطلاقا ..كل واحد فينا اخد رزقه و نصيبه اللي مكتوبله كامل ..و بمنتهي العدل .. و دة إللي بيحتم علينا أننا نرضي ..

ربنا سبحانه وتعالي قال: { الشيطان يعدكم الفقر ويأمركم بالفحشاء والله يعدكم مغفرة منه وفضلا }

 الشيطان يعدكم الفقر .. يعني عايزنا دايما نحس إننا فقراء .. مـش فلوس .. لأ هنا المقصود النعم .. يعني مش عايزنا نشوف نعم ربنا علينا .. عشان لو شفناها هنحمده ونشكره .. فالنعم هتزيد عشان وعد ربنا سبحانه وتعالي لينا بـ { لئن شكرتم لازيدنكم } ..

بيبدأ الانسان في الشعور بالتعاسه لما تتولد عنده القناعه بان ما ينقصه اكثر مما يملكه ولو ادرك ان ما يملكه هو اكثر مما يملكه معظم الناس لشكر الله ....وقلت تعاسته ..

فيعمل إيه الشيطان ابن الذين ده .. يلهيك يا بالنواقص و يخليك ماتشوفش النعم اللي عندك ، وتركز بس على اللي ناقصك ، عشان تفضل على طول تعيس و حاسس انك ناقصك كتير ، يبقى ربنا أكرمك بالأولاد اللي هم زينة الحياة الدنيا ، وتقعد طول النهار تشتكي من شقاوتهم ومسئوليتهم ، يبقى ربنا أكرمك بزوج أو زوجة سكن ومودة ورحمة ، وماتشوفش فية غير أوجه التقصير ، يبقى عندك شغلك اللي بيأمن لك مصاريفك والتزاماتك ، وماتشوفش منه غير الضغوط و مشواره البعيد ..

دايما بتهمش جزء من الكباية و عمرك م فكرت تبص علي الكباية كاملة ، برغم أن دة هو الطريق الوحيد للرضى...

الرضا هو انك تقبل كبايتك كاملة علي بعضها بنصها الفاضي و المليان ، تتقبل أن عندك نعم كتير و أن برضو ناقصك حجات كتير ، و دة عادي ، الرضا ان ربنا يختبرك و يزودلك النص الفاضي و يلاقيك  ثابت متقبل و قانع ، و تفضل متأكد أن رب الخير لا يأتي إلا بالخير و بتسعى و مكمل مش قاعد بتعترض و بتبكي علي اللي حصلك ولا بتبص للنعمة اللي في ايد غيرك ..

مش اي حد ينفع يُبتلي بمرض قاسي..

مش اي حد ينفع يُبتلي بفقد اعز ما يملك في الدنيا...

مش اي حد ينفع يُبتلي بزوال نعمة كانت من اساسيات حياته..

مش اي حد ينفع يبتلي بوجع بيكسر قلبه علي نفسه او حد بيحبه..

مش اي حد ينفع يعيش في ابتلاءات ورا بعض و مش بتنتهي!سبحان الله ربنا بيختار فئة معينة.. بيحبهم.. بيصطفيهم من بين مليارات  الناس لحكمة وحده اللي يعلمها، لرفع درجاتهم..

ثقوا ان اي حد مُبتلي فهو غير كل اللي حوليه، اقوي و اشجع و مفيش زيه كتير..

ثقوا انهم ابطال و ممكن لو اتحطينا مكانهم نفشل في الاختبار الرباني ده..

ربنا اختار ناس بيستقبلوا قضاء الله برضا احنا نفسنا بنقف عنده و نتنح من كمية الرضا و الاحتساب و الحمد.. و لذلك دورك الأكبر هو السعي نحو انك تبقي الشخص دة ..و اعرف ان الراضى ربنا بيراضيه فى كل حتة، واللى مش راضى دنيته ضيقة عليه فى كل حتة...

الرضا والقناعة  يخلونا نستمتع بالحياة ونتصالح مع نفسنا، لكن ناس كثير بيبصوا بس لنص الكباية الفاضي مش مدركين إنه احسن لهم  ، جايز لو الكباية اتملت للآخر مايستوعبوش وتتكسر منهم وبالتالي يفقدوا كل شيء ..

ما تبصش على نص الكباية الفاضي ..ولا على النص المليان.... 

هتضيع حياتك في البص على الفاضي والمليان..

السعي هو دورك الحقيقي ، بص علي نصك الحلو و قدره و حس بقيمته ...النص الحلو اللى فى كل واحد فينا ،الحاجات الحلوه اللى كل واحد مننا بيتميز بيها ،  فكر ازاي تكبر النص المليان اللى جواك وحاول تصلح عيوبك عشان يكون النص المليان اكبر من النص الفاضى ..

كبايتك كبيرة اوى.. تشيل ..بص على نص الكوباية الفاضى واعرف ان طول ما النص دا فاضى فانت عندك فرصة تملاه ، بس خلي بالك  ان عمر ما الكوباية حتتملى لاخرها وهيفضل دايما فيه مكان فاضى ..دي سنة الحياة ..

نص الكباية الفاضي .. انت اللى بتقدر تملاه حاول بس تعيش راضي .. الرزق كله علي الله..

في النهاية  

 

الكباية الفاضية/ المليانة.. اللي بيشوف نصها فاضي بيقول إن هو الصح... واللي بيشوف نصها مليان برضه بيقول إن هو الصح..

طيب والحقيقة؟.. همه اللي اتنين صح؟

لاء!.. همه اللي اتنين غلط..

والحقيقة هي.. إن الكوباية نصها مليان..  ونصها فاضي.

والدنيا كلها كدة.. موجب وسالب ، شروق وغروب ، حب وكراهية ، وفاء وخيانة ، خير وشر ، ربيع وخريف ، حياة وموت.

يعنى ماينفعش نشوف كل حاجة بنضارة سودا وسلبية ، ولا أن كل حاجة وردية و جميلة ..

باختصار.. مفيش يوتوبيا ولا مدينة فاضلة إلا في الكتب والروايات وخيال الأدباء والحالمين والعشاق..

الحقيقة.. إن ربنا ماخلقش جنة على الأرض.. ولا جهنم برضه...

المتشائم زيادة اللي بطبعه يائس ومحبط وسلبي ،بتكون نهايته الفشل والانعزال.

و المتفائل زيادة، آخرته بيتصدم في حاجات كتيرة حواليه وغالباً الصدمة دي بتكسره وتجيبله اكتئاب وبرضه ينتهي بالفشل والانعزال.

يعني الصح ..

نعيش بحساب  ونشوف الدنيا بألوانها الطبيعية من غير نضارات بمبي ولا سودا..خير الامور الوسط..

ونعمل لآخرتنا..

احلم .. بس وانت فايق و واقف على أرض ثابتة، واعمل كل اللي عليك...

فكِّر فيما عندك و فيما ليس عندك؛ فإنّ ما عندك من نعم الله، وما ليس عندك من حكمة الله.

وفي الآخر وده المهم..

ارضى ،صدّقني لو فقدت ما فقدت، لو كسّر الحرمان أضلاعك، هتجتاز  الحياة كما يجتازها كل الناس، فاختر الرضا يهُن عليك العبور..

        ‏"لا يبلغ العبد منزلة الرِضا حتى يستقر في قلبه اليقين بأن عطاءات الله تجري في أشياء تُمنع عنه، كما تأتي في أشياء           تُمنح له."