تهنئة خاصة من إدراة الجريدة إلي مقدم شرطة : صلاح الرصاص بمناسبة توليه المنصب الجديد بشرطة السياحة والآثار - الهرم المصرى نيوز

 

المقالة 4 " اللامبالاة "

بقلم : م / ماجد محمد المصرى

" بيجى عليك وقت لازم غصب عنك يبقى عندك لامبالاة فى حاجات كتير عشان تقدر تتعايش , لما بيضيع منك حاجات كتير غالية بتوصل لمرحلة اللامبالاة , بتبقى عايز تعدى يومك بدون اى ضغوط نفسية او اى شئ او اى حد يضايقك او يعكر صفو حياتك , و ده هايخلينا نتطرق لمحورين مهمين جدا :

المحور الاول : الفرق بين اللامبالاة و بين العزلة عن الناس .

المحور الثانى : اللامبالاة السلبية و اللامبالاة الايجابية .

بالنظر للمحور الاول هانعرف ان اللامبالاة هى محاولة البُعد بقدر الامكان عن اى حاجة تأذيك او تشيلك ضغوط او تسببلك اى ازعاج زى مثلا قصة حب قديمة الظروف حكمت انها ماتكملش فتفضل تفكر اوتفضلى تفكرى فيها فالبتالى هاتقلب/ى المواجع على نفسك بدون داعى , لأن دى فى الاخر ارادة ربنا , او مثال تانى مثلا صاحب طفولة الدنيا خدته وبطل يسأل او حتى بطل يكلمك خالص , الموضوع طبعا بيبقى صعب عشان بتصعب عليك العِشرة و العيش و الملح بس برضه لازم تبقى عارف انه لوكان فيه خير ليك او حتى ليه ربنا مكنش هايفرقكوا , و نقيس على كدة كل المواقف اللى بتحصل فى حياتنا , ولو فى حاجة تقدر تعديها عديها عشان لما هاتقهر نفسك ماحدش هايشيل همك غيرك ولا حد هايتعب غيرك , خلينا نحاول دايما نفضى دماغنا من اى حاجة ممكن تعكر صفو حياتنا , مثلا حد ماتصلش بيك بقاله فترة وعرف انك تعبان و مسألش ماتفضلش تقهر فى نفسك و تزعل و تحزن لأن هو اصلا مش حاسس باللى انت بتعمله , 

خلى الامور عادية وبعد كدة خلى المعاملة بما يساوى عدم اهتمامه و كذلك فى اى موقف تانى , ده هايخلينا نروح للجزء الثانى من المحور الاول و هو : هل معنى اللامبالاة هو انى انعزل عن الناس او ابقى عايش لوحدى ؟ طبعا لا , لأن العزلة عن الناس اسمها الانطوائية ودى انك تبعد عن الناس و تقفل على نفسك و توقف حياتك عشان موقف او عشان حد معين وانك تبقى انسان كئيب و دى غالبا السبب الرئيسى فيها البُعد عن ربنا  ودى مرحلة خطيرة جدا ربنا يكرمنا و عمرنا ما نوصلها .

ندخل للمحور الثانى و هو اللامبالاة السلبية و اللامبالاة الايجابية : وهنا ممكن حد يسأل هى اللامبالاة فيها سلبى و فيها ايجابى ؟ 

اكيد كل حاجة فى الدنيا ليها مميزات و عيوب و ايجابيات و سلبيات , كذلك اللامبالاة هى فى الاصل ايجابية ولكن عدم فهمها الصحيح و تطبيقها الاعمى بدون وعى يحولها إلى سلبية .

بمعنى ادق : لو فى شخص معين وجوده فى حياتك بيسببلك مشاكل و ازعاج و حاولت كتير انك تغيره و تفهمه ان التصرفات اللى بيعملها بتضايقك وهو مش عايز يتغير , حاول تستغنى عنه لأن البُعد عنه فى الحالة دى هايبقى مكسب ليك و دى اللامبالاة الايجابية , ولكن ماتخليش بُعدك عنه يخليك تكرهه او تحقد عليه او تتمنى ليه الشر لأن هنا اللامبالاة اصبحت سلبية لأنها غيرت فيك حاجة للاسوء خليتك تكره وتتمنى الشر لغيرك و ده طبعا مش مطلوب خالص .

ولو حبينا نطبق نفس المقياس ده على مشكلة معينة حصلت فى الشغل او مشكلة اسرية و المشكلة دى مسببة ليك ضغط نفسى و 

عصبى غير طبيعى و مأثرة على حياتك بشكل عام , استخدام اللامبالاة هنا لازم يبقى بالعقل بمعنى انى مابقاش كل شوية شغال افكر " انى لو كنت عملت كذا ماكنش حصل كذا " او انى " لوكنت اخذت القرار الفلانى ماكنش حصل اللى حصل " , فلازم ابقى عارف انى خلاص بيقت فى المشكلة  و التأنيب و التفكير السلبى فى الموضوع مش هايحل المشكلة , هنا لازم استخدم اللامبالاة الايجابية انى احاول ابعد عن التفكير السلبى اللى مش هايقدم ولا هيأخر , وانى احاول افكر فى حل منطقى و عملى و موضوعى للمشكلة , لكن انا اسيب التفكير الايجابى و افضل افكر انى لوعملت كذا ماكنش حصل كذا و البكاء على اللبن المسكوب , او انى اقول ماليش دعوة و اللى يحصل يحصل و اللى اتسبب فى المشكلة يحلها و انا ماليش علاقة , كل ده اسمه هروب من المشكلة و ليس حلها , وهنا اللامبالاة بتتحول للامبالاة سلبية لأنها اتحولت لمرحلة البرود بمعنى ان مابقاش فارق معاك حاجة المشكلة تتحل ماتتحلش مش فارقة , اهم حاجة انك بتاكل و بتشرب و بتنام ومالكش دعوة بحاجة و الايام بتعدى عليك و خلاص , وده مفهوم ناس كتير عن اللامبالاة ان انا  ابعد عن المشكلة برمتها وده مش صحيح لأن ده زى ما وضحنا هروب من المشكلة وده ناتج عن تطبيق اللامبالاة بدون فهم معناها او الغرض منها , ولكن عند فهم المعنى الايجابى و الغرض من اللامبالاة هتلاقى نفسك بتبعد اى حاجة ممكن تشوش او تأثر عليك عشان تقدر توصل لحل المشكلة و هاتبدأ تفكر فى حل يناسب المرحلة الحالية للمشكلة لأن كل مشكلة بتمر بعدة مراحل و ده موضوع هانتكلم عنه فى مقالة منفصلة بعنوان " كيفية إدارة الضغوط و الازمات " , اتمنى انى اكون قدرت اوصل وجهة نظرى فى موضوع اللامبالاة وانى اكون اتكلمت فى الموضوع بشكل مختلف و بسيط .