كلمتين على الماشى/الهرم المصرى نيوز

 

📌

 د/شيماء أحمد 

استشاري الصحه النفسيه والإرشاد الاسري

واحد من أكبر أسباب الانفصال في الوقت الحالي👌

 ومعظم الناس مبتتكلمش عنها هو 

إن الشخصيات المضطربة بتدخل العلاقة بتوهم الشريك إن في حب وأنهم هيعيشوا حياة سوية ، ولكن في الحقيقة هو حاطه في دور متفصل علشانه يقوم بيه لإشباع احتياج ما 

مش كدا بس ، لا هو بيبقي باصص علي كل حقوقه من الشريك ومش في مخططه يعمل واجباته ناحية الشريك .

تقف علي كدا !! لا دا بيدرس إحتياجات الشريك عشان يلاعبه بيها ويساومه عليها عشان يضغط عليه بيهم ويخليه يمارس الدور الي هو راسمهوله .

مفيش مانع إن الأهل المضطربين يبقوا شركاء في عمليات التفصيل دي .

💬يدخل الشريك الغلبان وهو :ـ

راسم صورة وردية للعلاقة بناءً علي المعطيات الي شافها في البداية .

عايز استقرار وحياة فيها عطاء وتفاهم .

محتاج للحب وجعلت اهتمام فاكر أنه أخيراً ارتاح .

فبيلاقي :ـ 

👈إهانات متكررة .

👈ابتزاز عاطفي .

👈مساومة علي الاحتياجات مقابل تنفيذ الأوامر .

👈طلبات غير منطقية وغير مقبولة .

👈قمص ، هجر ، خيانة .

👈فضايح والعلاقة تخرج من خصوصيتها وتبقي مشاع .

👈تهديد بالانفصال طول الوقت .

👈انت مش كفاية ومش مهم .

👈تحقير ليك مقابل تعظيم لنفسه .

👈كلام بالكدب بيتقال عليك وبتتشوه صورتك .

👈طول الوقت أفعاله السيئة رد فعل لتصرفاتك فأنت الي مفروض تعتذر .

توتر وضغط عصبي ونفسي وحرمان وفراغ .

محاولات قطع علاقتك بكل الناس والحاجات الي بتحبها عشان يبقي سهل التحكم فيك 

فبيكون شكل العلاقة 💯

كأنك جيت تسكن شقة مفروشة دخلت الشقة ملاقتش غير كرسي مربع صغير تنام عليه والشقة كلها علي البلاط ومطلوب منك تعيش حياتك بشكل طبيعي في محيط الكرسي دا وممنوع تتحرك في باقي الشقة ولا تضيف حاجة .

ومفروض طول الوقت تمتن وتكون مبسوط ومتشتكيش ولا تعترض .

العلاقات الي زي دي بتكون مبنية علي :-

✍الغش لأنه من الأول مبيقولش الحقيقة (انا ميولي الجنسية مش مظبوطة ، مبحبش القرب والحمية في العلاقة ، بعاني من اضطراب ما ، سادي ، مازوخي ، معقد ، بخيل ، مش عايز /ة اطفال ، عايز أم أو أب بديل مش زوج وزوجة ، متعلق بأهله ومش صاحب قراره ، وسواسي ، شكاك ، قلوقة ) 

✍الثقة في إنه بأعلاعيبه هيقدر هيفرض اضطرابه علي الشريك وهيقبل لأنه مختاره بمواصفات معينة (مش بيثق في نفسه ، إحساسه بالاستحقاق بعافية ، اتعرض لصدمات طفولة وطفولة قاسية ، خار من تجربة صعبة ، بيعاني من الوحدة والفراغ ، عنده احتياج وجوع للحب والاهتمام ، عنده عقدة المنقذ ) .

✍مجهز أسلحته عشان ميطلعش خسران ، عنده درج من أربع خانات حاطط فيه (حيل للتلاعب عشان يخلي الشريك تحت سيطرته ، حيل ابتزاز وضغط لو الشريك حاول يرفض التلاعب ويمشي ، أدوات تشويه السمعة والتهديد بالأذى لو صمم علي البعد ، ضحية جديدة بيجهزها عشان ميضيعش وقت ) .

طول الوقت عمال يقصقص في الشريك ويصنع منه مسخ عشان يضمن بقاءه تحت سيطرته أطول فترة ممكنة ويستغله بأقصي درجة ممكنة .

✍الحل 

💡زيادة الوعي بشكل العلاقة الي احنا فيها .

💡معرفة الأسباب الي جذبتنا للعلاقة دي .

💡فك التعلق بالشخصية دي والخوف من الشخص المضطرب أو الضياع من نهاية العلاقة .

💡الاهتمام بنفسنا بدل الاهتمام بتصرفات المضطرب وتحليلها .

💡وضع الحدود وعدم الاستجابة لالاعيبه .

💡اللجوء لمختص للمساعدة من تأثير العلاقة السامة دي علينا

✍النرجسية الخفية هي نوع من الشخصيات النرجسية الذي يتمتع بمهارات استعراضية متقنة، حيث يظهر اهتماماً زائفاً بالآخرين ويظاهر التعاطف والبكاء عندما تتطلب الظروف ذلك. على الرغم من عدم قدرتهم الحقيقية على التعاطف مع الآخرين، إلا أنهم يتعلمون كيفية تظاهر بذلك بهدف تحقيق مصالحهم الشخصية.

يعيش النرجسي(ة) الخفي(ة) طوال حياته في محاولة للحفاظ على صورته المزيفة وتظاهره المستمر. عندما يشعر بأن شخصاً ما يقترب من كشف حقيقته أو يهدد بالكشف عن ذلك، يتحول النرجسي(ة) إلى حالة تسمح له بتدمير هذا الشخص بأي ثمن.